Një veturë me dy persona, shtetas serbë, është ndaluar dje në zonën e Kosharës nga Policia e Kosovës.
Sipas dëshmitarëve okularë, disa çiklistë kanë vërejtur një veturë me targa të Serbisë (SJ-032-IT) dhe menjëherë kanë njoftuar Policinë e Gjakovës. Policia ka reaguar me shpejtësi, duke u nisur drejt fshatit Koshare, ku edhe ka arrestuar dy personat e dyshuar, shtetas të nacionalitetit serb.
Arrestimi është kryer në fshatin Batushë, ndërsa sipas burimeve të gazetës “Epoka e Re”, të dyshuarit aktualisht ndodhen në stacionin policor të Gjakovës. Ndërkohë, automjeti i tyre është tërhequr me automjetin “marimangë” dhe është dërguar për në Gjakovë.
Pas verifikimeve të kryera nga autoritetet, nuk është konstatuar ndonjë shkelje ligjore, dhe personat janë liruar.
Lajmin e ka konfirmuar zëdhënësi i Policisë për rajonin e Gjakovës, Sheremet Elezaj.
Vlen të rikujtohet se vetëm disa ditë më parë, qendra.info kishte raportuar për vizitat e organizuara të serbëve lokalë nga veriu i Mitrovicës drejt Karaullës së Koshares, një zonë simbolike e luftës së UÇK-së. Kjo është parë si provokim nga qytetaret shqiptar te asaj zone./Qendra.Info
