Presidenca e Kosovës ka njoftuar sonte se presidentja Vjosa Osmani ka pranuar letër nga presidenti amerikan, Donald Trump, ku ky i fundit e quan atë ‘mikeshë të vërtetë të SHBA-së’, shkruan Gazeta Metro.
Në njoftim nuk është ndarë edhe letra zyrtare prej presidentit amerikan, mirëpo thuhet se ai e ka falënderuar presidenten Osmani për lidershipin e saj.
“Sot, Presidentja Osmani ka marrë një letër nga Presidenti i Shteteve të Bashkuara të Amerikës, Donald J. Trump, në të cilën ai e falënderon për përkushtimin dhe miqësinë ndaj Shteteve të Bashkuara, lidershipin e guximshëm dhe shpreh dëshirën për të thelluar bashkëpunimin në vitet që vijnë”, thotë Presidenca.
Pastaj, Presidenca ndan një pjesë të letrës së ardhur nga presidenti i SHBA-së.
“Shtetet e Bashkuara të Amerikës dhe Kosova ndajnë një lidhje të thellë, të bazuar në respektin e ndërsjellë, vlera të përbashkëta demokratike dhe një vizion për një të ardhme paqësore dhe prosperuese. Përkushtimi juaj për forcimin e kësaj lidhjeje nuk ka kaluar pa u vërejtur, dhe jam i bindur se së bashku do të vazhdojmë të avancojmë qëllimet tona të përbashkëta,” ka theksuar presidenti Trump në letrën e tij, sipas Presidencës së Kosovës.
Në fund, Presidenca e Kosovës thotë se presidenti Trump u shpreh i gatshëm të punojë më Osmanin në të ardhmen, si dhe ndau përshëndetje edhe nga Zonja e Parë e SHBA-së, Melania Trump./gazetametro.net
