Prishtinë, 11 Tetor 2025 – Presidentja e Republikës së Kosovës, Vjosa Osmani, ka dekretuar sot kryetarin e Lëvizjes Vetëvendosje, Albin Kurti, si mandatar për formimin e Qeverisë së re të Republikës së Kosovës.
Dekretimi vjen pas propozimit zyrtar nga partia Lëvizja Vetëvendosje, e cila doli fituese me numrin më të madh të ulëseve në Kuvend nga zgjedhjet e mbajtura më 9 shkurt 2025.
Sipas Kushtetutës së Kosovës, mandatarit i jepet afat prej 15 ditësh nga dita e dekretimit për të paraqitur përbërjen dhe programin qeverisës për miratim në Kuvendin e Kosovës.
Presidentja Osmani i ka uruar suksese z. Kurti në procesin e formimit të Qeverisë, duke shprehur shpresën se Kosova do të ketë së shpejti një qeveri të re me mandat të plotë kushtetues.
