Prishtinë, 25 gusht 2025
– Sonte në orën 21:30, në rrugën “2 Korriku”, të njohur ndryshe si “kafet e rakisë”, do të vendoset një pllakatë përkujtimore në nder të Martin Hajdarit, themeluesit të lokalit ikonik “Te Martini”, një simbol i jetës urbane dhe kulturore të kryeqytetit.
Ceremonia përkujtimore do të mbahet para lokalit që për dekada ishte shtëpia e shumë brezave, artistëve, studentëve dhe qytetarëve që e ndienin veten pjesë e frymës unike që Martini krijoi.
“Martini nuk ishte thjesht një emër. Ai ishte një gjendje, një ndjesi, një mik i përhershëm për Prishtinën,” tha një nga frekuentuesit e vjetër të lokalit.
Pllaka përkujtimore, që do të vendoset në hyrje të lokalit, do të shërbejë si kujtim i përhershëm për njeriun që krijoi një hapësirë të veçantë në zemër të Prishtinës, e cila nuk u bë kurrë thjesht një kafene – por një pikëtakim emocionesh, ngjarjesh e kujtimesh.
Martin Hajdari ndërroi jetë më 3 maj 2025, por trashëgimia e tij vazhdon të jetojë mes rrugëve të qytetit dhe kujtimeve të njerëzve që ai i bashkoi.
