Kandidati për deputet i Nismës Scoial Demokrate, Prof. Dr. Artan Nimani, përmes një mesazhi publik ka ftuar familjarët, miqtë, studentët dhe të gjithë qytetarët që të marrin pjesë në zgjedhje dhe të mbështesin kandidaturën e tij me numrin 7, në kuadër të subjektit të Nismës me numër 122.
Në mesazhin e tij, Nimani thekson se synon t’i shërbejë qytetarit dhe shtetit me ndershmëri dhe përgjegjësi, duke u bazuar në përvojën e tij akademike dhe profesionale. Ai vë në pah nevojën që Kosova të fokusohet në arsim cilësor, drejtësi të barabartë, ekonomi të qëndrueshme, shëndetësi funksionale, integrim ndërkombëtar, siguri dhe zhvillim të përgjithshëm.
Sipas Nimanit, këto fusha kërkojnë përkushtim, punë të ndershme dhe vendimmarrje në interes të qytetarëve. Ai u bën thirrje qytetarëve që, në frymën e demokracisë dhe përgjegjësisë qytetare, të dalin për të votuar.
“Në fund, vota e qytetarëve është vendimtare për përfaqësim dinjitoz dhe për ndërtimin e një të ardhmeje më të sigurt për Kosovën”, ka shkruar Nimani.
