Dy profesorë universitarë janë ndaluar nga policia në Novi Sad gjatë 24 orëve të fundit, nën rrethana të paqarta dhe pa urdhër zyrtar. Bëhet fjalë për Veroljub Naumović, profesor në Akademinë e Arteve, dhe Miloš Jocić, profesor në Fakultetin Filozofik – të dy pjesë e strukturës organizative të protestave të njohura si “Zborovi Novog Sada”.
Sipas Slobodnog univerziteta, një platformë e pavarur akademike dhe qytetare, Naumović ndodhet aktualisht në stacionin policor në lagjen Detelinara, ndërsa Jocić është mbajtur për më shumë se katër orë në polici në Baç.
Përfaqësuesit e “Zborit Novi Sad” pohojnë se arrestimi i Naumović është kryer pa urdhër gjyqësor, me justifikimin e paqartë se “duan të bisedojnë” lidhur me një “shkelje të mundshme të rendit publik”. Ata e cilësojnë këtë si pjesë të një fushate më të gjerë represive kundër aktivistëve dhe qytetarëve mendimtarë të lirë.
“Nënvizojmë se të ndaluarit nuk kanë qenë të përfshirë në asnjë incident. Këto ndalime janë përpjekje për të frikësuar aktivistët dhe për të shtypur zërin e universiteteve të lira,” thuhet në deklaratën zyrtare të Slobodnog univerziteta, e siguruar nga Qendra.INFO.
Zbor Novi Sad kërkon lirimin e menjëhershëm të profesorëve dhe ndalimin e menjëhershëm të ndjekjeve dhe presioneve policore ndaj pjesëmarrësve në protesta. Ata theksojnë se asnjë nga veprimet e të ndaluarve nuk ka përbërë shkelje të ligjit, por përkundrazi kanë qenë shembull i përgjegjësisë qytetare dhe solidaritetit.
“Ky nuk është thjesht një sulm ndaj individëve. Kjo është një përpjekje për të goditur lirinë, dijen dhe dinjitetin tonë kolektiv. Nuk do të heshtim,” thuhet në deklaratën e tyre.
Zbori ka paralajmëruar mbështetje të organizuar për të ndaluarit dhe do të njoftojë publikun për datat e seancave të mundshme gjyqësore.
