Albulena Brestovci Agushi, një emër i njohur në fushën akademike dhe profesionale, ka hyrë në garën për Kuvendin Komunal të Lipjanit nga radhët e Partisë Demokratike të Kosovës. Me një profil të plotë që bashkon dijen, përvojën dhe angazhimin shoqëror, ajo shihet si një nga zërat e rinj që mund të sjellin ndryshim në vendimmarrjen lokale.
Brestovci Agushi është profesoreshë universitare dhe studiuese e administratës publike, ndërsa aktualisht po finalizon doktoratën në këtë fushë. Ajo veçohet si e vetmja grua në Kosovë që ka ndjekur të tri nivelet e studimit në administratë publike. Për më shumë se një dekadë ka ligjëruar në Kolegjin AAB, duke ndihmuar në formimin e brezave të rinj të profesionistëve, ndërkohë që ka botuar punime shkencore në revista ndërkombëtare prestigjioze.
Përvoja e saj nuk kufizohet vetëm në akademi. Ajo ka qenë e angazhuar në institucione publike, organizata ndërkombëtare dhe konferenca shkencore, ndërsa karrierën e nisi herët, si edukatore bashkëmoshatare në organizatën Care International (2006–2008). Ka kontribuar gjithashtu me punë vullnetare për Kryqin e Kuq dhe Qendrën Rinore në Lipjan.
Nga viti 2009 deri në 2015, ka ndërtuar karrierë të suksesshme edhe në sektorin privat, duke drejtuar kompani me mbi 400 punëtorë në të gjithë Kosovën – një arritje që e vlerëson si një nga sfidat dhe sukseset më të mëdha të saj profesionale.
Kombinimi i përvojës akademike, menaxheriale dhe shoqërore e bën Albulena Brestovci Agushin një kandidate të veçantë në garën për Kuvendin e Lipjanit, duke premtuar kontribut në zhvillimin lokal dhe përfaqësim më të fuqishëm të grave në vendimmarrje.
