Prishtinë, 14 janar 2026 – Prokuroria Speciale e Republikës së Kosovës ka ndarë pamje nga bastisja e shtëpisë së të arrestuarit nën dyshimet për sulm ndaj pjesëtarëve të misionit paqeruajtës KFOR dhe të Policisë së Kosovës, i cili u arrestua sot pas hetimeve disa mujore.
Sipas njoftimit zyrtar, S.R. është ndaluar për 48 orë me dyshimin se ka kryer disa vepra penale, përfshirë bashkim për veprimtari kundërkushtetuese, rrezikim të personave nën mbrojtje ndërkombëtare, pjesëmarrje në turmë që kryen vepra penale dhe huliganizëm, si dhe sulm ndaj personit zyrtar – duke përfshirë ushtarë të KFOR-it dhe policë të Kosovës.
Në bastisjen e kryer në vendbanimin e të dyshuarit, hetuesit e prokurorisë në bashkëpunim me Policinë e Kosovës gjetën dhe sekuestruan prova materiale që pritet të përdoren gjatë procedurës penale. Autoritetet thonë se brenda afatit ligjor do të paraqitet kërkesë për caktimin e masës së paraburgimit në Gjykatën Themelore në Prishtinë.
Arrestimi vjen si rezultat i hetimeve për ngjarjet e zhvilluara më 29 maj 2023 në veri të Kosovës, ku gjatë protestave në Zveçan u përdorën mjete të dhunshme ndaj anëtarëve të misionit paqeruajtës të NATO-s – KFOR – si dhe ndaj Policisë së Kosovës. Në këto përleshje, dhjetëra pjesëtarë të forcave të sigurisë kishin pësuar lëndime, disa prej tyre të rënda.
Prokuroria Speciale deklaroi se hetimet do të vazhdojnë dhe publiku do të njoftohet për zhvillimet e mëtejshme të rastit./Qendra.INFO
