Prokuroria Speciale e Republikës së Kosovës ka konfirmuar zyrtarisht se ministrja në detyrë e Tregtisë dhe Industrisë, Rozeta Hajdari, është thirrur për t’u deklaruar si e pandehur në kuadër të hetimeve për aferën e rezervave shtetërore.
Lajmin e ka bërë të ditur zëdhënësja e Prokurorisë, Arbnora Luta, e cila ka sqaruar se ftesa për Hajdarin është bërë në përpjekje për të ndriçuar plotësisht dhe drejtë gjendjen faktike të rastit.
“Znj. Rozeta Hajdari është ftuar në cilësinë e të pandehurës në hetimet për rastin ‘Rezervat shtetërore’. Qëllimi i kësaj thirrjeje është sqarimi i të gjitha dyshimeve që janë objekt i hetimeve,” ka deklaruar Luta për Teve1.
Sipas saj, Hajdari ka vendosur të ushtrojë të drejtën e saj ligjore për të qëndruar në heshtje, njëjtë si gjatë paraqitjes së saj të parë për këtë rast.
“Rasti po trajtohet në përputhje të plotë me rregullat dhe standardet e përcaktuara në Kodin e Procedurës Penale,” ka shtuar Luta.
Ndërkohë, hetimet për këtë aferë të ndjeshme vazhdojnë me intensitet, teksa Prokuroria Speciale po synon të zbardhë të gjitha rrethanat dhe përgjegjësitë e përfshira në këtë çështje.
