Në qytetin Lead të Dakotës së Jugut, po ndërtohet një laborator gjigand në një ish-minierë ari, 1.5 kilometra nën tokë. Ky projekt quhet DUNE (Eksperimenti i Thellë nëntokësor për Neutrino) dhe është një nga eksperimentet shkencore më të mëdha ndonjëherë në SHBA.
Qëllimi? Të zbulohet pse ekziston universi dhe pse materia mbizotëron ndaj antimateries, një mister që ka sfiduar shkencëtarët për dekada.
Një përshpejtues grimcash në Fermilab, pranë Çikagos, do të dërgojë një rreze neutrinosh drejt këtij laboratori nëntokësor 1,300 km larg. Neutrino është grimca më e pakapshme në univers – kalon përmes gjithçkaje pa u ndalur.
Për ta “kapur”, po ndërtohen dhoma gjigande nën tokë, më të mëdhatë ndonjëherë në atë thellësi. Eksperimenti pritet të nisë në vitin 2032 dhe mund të sjellë përgjigje për pyetjen më të madhe: Pse ekzistojmë?
