Presidenti rus Vladimir Putin ka shprehur gatishmërinë për të rifilluar dialogun me presidentin francez Emmanuel Macron, në një moment delikat për negociatat rreth luftës në Ukrainë dhe rolin e Evropës në procesin e paqes.
Lajmi u konfirmua nga zëdhënësi i Kremlinit, Dmitry Peskov, pasi Macron deklaroi se, nëse ndërmjetësimi amerikan dështon, vendet evropiane duhet të flasin drejtpërdrejt me Moskën. “Putin është gati për dialog”, tha Peskov, duke nënvizuar hapjen e Kremlinit për një bisedë me homologun francez.
Edhe Pallati Elize ka konfirmuar se rikthimi i kontakteve me Moskën shihet si i dobishëm, teksa perspektiva e një armëpushimi dhe negociatave për paqe po bëhet më e qartë. Megjithatë, ende nuk ka një datë konkrete për një takim të mundshëm, ndërsa kushtet e dialogut pritet të përcaktohen në ditët në vijim.
Iniciativa e Macron vlerësohet si përpjekje për ta rikthyer Francën në qendër të diplomacisë evropiane mbi Ukrainën, në një kohë kur BE-ja synon një rol më aktiv dhe ekziston frika se një proces i dominuar vetëm nga SHBA-ja mund të anashkalojë interesat evropiane.
Megjithatë, kjo lëvizje është pritur me rezervë nga disa liderë evropianë, për shkak të rrezikut të krijimit të ndarjeve brenda BE-së. Ndërkohë, mbetet e paqartë nëse dialogu Paris–Moskë do të sjellë rezultate konkrete drejt paqes./Qendra.INFO
