Prishtinë – Një përballje e paprecedentë ka ndodhur në hapësirën publike mes ministrit të Bujqësisë së Kosovës, Faton Peci, dhe gazetarit Ermal Panduri, pas emisionit më të fundit televiziv ku i ftuar ishte gazetari Lirim Mehmetaj. Përmes një statusi në rrjetin social Facebook, ministri Peci ka përdorur gjuhë të rëndë dhe fyese ndaj Pandurit, duke e quajtur “qelbësirë” dhe “analfabet që është bërë milioner përmes shpifjeve dhe shantazhit”.
“Pas një shfaqjeje teatrale, shpifjesh ordinere dhe shantazhi edhe ndaj mekanizmave hetues e prokurorëve, në fund qelbësira tha: ‘Paramendoni Kosova me pasë SPAK.’ Po, valla, paramendoni ku do të përfundonin analfabetët si ti, që përmes shpifjeve e shantazheve të këtij lloji janë bërë milionerë”, shkroi ministri në profilin e tij zyrtar.
Fjalori i përdorur nga ministri ka ngjallur reagime të shumta në opinionin publik dhe rrjetet sociale, ku përdorimi i termave fyese nga një përfaqësues i lartë i Qeverisë është cilësuar si i papranueshëm dhe degradues për diskursin institucional.
Statusi i ministrit erdhi pas emisionit “Debat Plus” ku Mehmetaj shpaloste afera korruptive ne ministrin e drejtuar nga Ministri Peci.
Për momentin, nuk ka asnjë reagim publik nga gazetari Ermal Panduri lidhur me akuzat dhe gjuhën e përdorur nga ministri. Po ashtu, nuk dihet nëse do të ketë ndonjë veprim zyrtar nga ana e institucioneve për këtë incident që vë në pikëpyetje etikën e komunikimit nga zyrtarët publikë.
