Ish-inspektori i përgjithshëm i Agjencisë së Kosovës për Inteligjencë (AKI), Burim Ramadani, ka reaguar pas dëmtimit të vendpunishtes së urës për këmbësorë mbrëmjen e kaluar në Mitrovicë, duke e cilësuar incidentin si një cenim flagrant të sigurisë kombëtare.
Ramadani ka theksuar se ky rast tregon se infrastruktura kritike e sigurisë kombëtare mbetet e rrezikuar dhe se jo çdo gjë është nën kontroll, pavarësisht se ende nuk dihet shkaktari i incidentit.
“Dëmtimi i vendpunishtes së urës për këmbësorë në Mitrovicë është, pa dilemë, cenim i sigurisë kombëtare. Kjo pavarësisht shkaktarit,” ka deklaruar ai.
Në reagimin e tij, Ramadani ka kujtuar se Kosova tashmë prej rreth 10 muajsh është pa qeveri funksionale, dhe se në këto kushte, sektori i sigurisë duhet të dëshmojë aftësi për mirëmbajtjen e stabilitetit.
Ai ka apeluar që politikanët të mos ndërhyjnë, por të lënë institucionet e sigurisë të kryejnë detyrat e tyre profesionale.
“Siguria kombëtare nuk bëhet nga foltoret e politikanëve, por nga sektori i sigurisë që kryen detyrat e veta,” ka theksuar Ramadani.
Hetimet për incidentin në urën e këmbësorëve në Mitrovicë janë duke vazhduar, ndërsa autoritetet nuk kanë dhënë ende informacione mbi autorët apo motivet e mundshme.
