Presidentja Vjosa Osmani ka tërhequr sot kërkesën që e kishte dorëzuar në Gjykatën Kushtetuese, lidhur me konstituimin e Kuvendit, pas caktimit të Radomir Laban si gjyqtar raportues në këtë lëndë.
Ajo tha se Laban ka një veprimtari të rrezikshme në vitet 2018, 2021 dhe 2024 dhe se këto informacione zyrtare janë dorëzuar nga institucionet e sigurisë, shkruan Periskopi.
Vendimin e Osmanit, e quan ‘hap gjigant drejt kaosit’, ish-kryeinspektori i AKI’së Burim Ramadani.
Ramadani në një përgjigje për Periskopin tha se paraqitjen e Osmanit në konferencë për media ku foli për Laban e sheh si ”performancë patriotike si pjesë e mendësisë që çon Kosovën drejt kaosit”.
” Pavarësisht nëse përmbajtja e asaj që tha sot Presidentja është e saktë apo jo, thelbi që unë shoh është tek thellimi me hapa të mëdhenj në mosbesimin në institucione.
Kosova po futet në kaos institucional e politik, ndërsa nga pranvera e ardhshme mund të arrij edhe kaosit financiar.
Këtë po e mbushin çdo ditë e më shumë krerët e shtetit, që fuqishëm dëshmojnë mosbesim në institucione të drejtësisë, në ekonominë e tregut të lirë dhe në gjithçka tjetër.
Veç kujtojeni se Kryeministri refuzon të paraqitet në Prokurori dhe Presidentja refuzon ta dekretojë Kryeprokurorin tash e sa vjet”, u shpreh ai.
