Ramiz Lladrovci, ish-kryetari i Komunës së Drenasit dhe një nga figurat e njohura të Partisë Demokratike të Kosovës (PDK), ka reaguar pas vendimit të Kryesisë së kësaj partie për ta zëvendësuar atë në garën për zgjedhjet lokale të 12 tetorit.
Përmes një deklarate publike, Lladrovci ka njoftuar formimin e një subjekti të ri politik lokal, me emrin:
“Për Drenasin Kampion me Ramiz Lladrovcin (PDKRLl)”.
Ai e konsideron vendimin e Kryesisë së PDK-së si të padrejtë dhe në kundërshtim me vlerat që ka përfaqësuar kjo parti ndër vite në komunën e Drenasit. Në deklaratë thuhet se:
“Vendimi për të zëvendësuar kryetarin më të suksesshëm në historinë e performancës komunale në Republikën e Kosovës, përmes një procedure të paparë, është në kundërshtim me interesin qytetar dhe me vlerat e PDK-së.”
Lladrovci thotë se subjekti i ri nuk përfaqëson largim nga PDK, por një nismë për të mbrojtur komunën dhe qytetarët nga keqpërdorimi i pushtetit dhe ndikimet e jashtme.
“PDKRLl” do të garojë vetëm në zgjedhjet lokale, për pozitën e kryetarit të komunës dhe për asamblenë komunale. Ai shpreh besimin se qytetarët do ta mbështesin këtë nismë që, sipas tij, synon ruajtjen e qeverisjes së mirë, pa korrupsion dhe me llogaridhënie.
“Bashkë, vazhdojmë. +4. PDKRLl!” – përfundon deklarata e Lladrovcit.
Lëvizja e re e Lladrovcit pritet të sjellë dinamika të reja në garën lokale në Drenas, e cila ka qenë bastion i fuqishëm i PDK-së për më shumë se dy dekada.
