PRISHTINË – Juristja për media, Flutura Kusari, ka publikuar raportin e Bashkimit Evropian për Kosovën për vitin 2025, duke theksuar sfidat dhe shqetësimet lidhur me lirinë e mediave në vend, raporton Periskopi.
Sipas raportit:
-
Gjatë periudhës së raportimit janë dokumentuar 70 raste sulmesh fizike, verbale ose kërcënimesh ndaj gazetarëve, përfshirë pengimin e punës së tyre.
-
Në fushatën zgjedhore, zyrtarë të lartë të Kosovës, përfshirë Kryeministrin Albin Kurti, kanë përdorur gjuhë fyese dhe ofenduese ndaj mediave.
-
Raporti thekson nevojën për harmonizim të legjislacionit të Kosovës me acquis-in e ri të BE-së, duke përfshirë Ligjin për Radiotelevizionin e Kosovës (RTK), mbrojtjen e burimeve gazetareske dhe Ligjin Civil kundër shpifjes dhe fyerjes.
-
Komisioni i Pavarur i Mediave (KPM) vazhdon të përballet me mungesë kuorumi dhe pengesa operative, duke minuar aftësinë për të marrë vendime, përfshirë gjatë fushatës zgjedhore.
-
Radio Televizioni i Kosovës (RTK) mbetet i pa-funksional, për shkak të mungesës së kuorumit në Bordin e tij, boshllëqeve në drejtim dhe mungesës së financimit të qëndrueshëm.
Raporti i BE-së nënvizon se pa reforma ligjore dhe financim të qëndrueshëm, RTK-ja dhe mediat në Kosovë mbeten të cenueshme ndaj presioneve politike dhe pasigurisë financiare.
“Gjatë fushatës zgjedhore, zyrtarë të lartë të Kosovës, përfshirë edhe Kryeministrin, përdorën gjuhë ofenduese ndaj mediave,” thuhet në raport.
Raporti gjithashtu rekomandon ndërhyrje ligjore për të siguruar pavarësi dhe funksionalitet efektiv të mediave publike, për të garantuar transparencën dhe lirinë e informacionit në vend.
