Prishtinë, 14 tetor 2025 – Nënkryetari i Kuvendit nga radhët e komunitetit serb, Nenad Rashiq, ka deklaruar se do të dëshironte që Lëvizja Vetëvendosje (LVV) të formojë koalicion qeverisës me Lidhjen Demokratike të Kosovës (LDK).
“Si zakonisht, Lista Serbe në cilëndo formë që unë jam i inkorporuar për ndonjë pozitë apo situatë zgjedhore, ata gjithmonë janë kundër dhe e kanë një organizim brutal, prandaj nuk është befasi prej tyre. Unë kisha qenë i gëzuar që të kemi një qeveri, një mazhorancë stabile për shkak të sfidave që kemi, për shkak të marrëdhënieve ndërkombëtare. Prandaj do të isha i gëzuar që LVV të bëjë koalicion me LDK, atëherë do të kishim pasur një numër më të madh deputetësh,” tha Rashiq në Tëvë1.
Ai shtoi se do ta inkurajonte kryeministrin Albin Kurti që të konsiderojë një bashkëpunim të tillë, duke e vlerësuar LDK-në si parti serioze dhe institucionale.
Rashiq gjithashtu komentoi qëndrimin e PDK-së, e cila nuk e ka mbështetur zgjedhjen e tij si nënkryetar të Kuvendit, duke thënë se një veprim i tillë nuk është befasi.
