Real Madridi ka marrë vendimin për të mos aktivizuar opsionin e riblerjes për mesfushorin argjentinas Nico Paz, i cili aktualisht është pjesë e klubit italian Como.
Vendimi është konfirmuar edhe nga vetë klubi italian, i cili njoftoi se Real Madridi ka refuzuar të paguajë klauzolën prej 8 milionë eurosh, që ishte e vlefshme për këtë verë. Sipas marrëveshjes, klauzola do të rritet në 9 milionë euro verën e ardhshme.
Como e konsideron Nico Paz pjesë kyçe të projektit të tij afatgjatë, pas një sezoni të shkëlqyer nga lojtari 20-vjeçar, i cili regjistroi 35 ndeshje, me 6 gola dhe 9 asistime në Serie A, duke ndihmuar skuadrën të mbyllë sezonin në vendin e 10-të.
E ardhmja e Pazit pritet të jetë e ndritur në Itali, me klubin që ka besim të plotë në potencialin dhe zhvillimin e tij si lider i mesfushës.
