Protestat masive që shpërthyen dje dhe kulmuan mbrëmë në mbarë Serbinë kanë përfunduar me dhunë, duke lënë dhjetëra të lënduar. Qytetarë dhe studentë dolën në rrugët e Beogradit, Novi Sadit, Nišit e Kragujevcit për të kërkuar ndryshimin e regjimit dhe ndalimin e represionit policor.
Në Novi Sad, sipas burimeve të qendra.info, simpatizantë të Partisë Përparimtare Serbe (SNS) sulmuan turmat me mjete piroteknike, gurë dhe shishe, duke shkaktuar plagosjen e disa personave. Sipas raportimeve të para, të paktën 15 qytetarë u trajtuan nga shërbimet mjekësore pas sulmeve të dhunshme.
Në Beograd, mbrëmë situata doli jashtë kontrollit kur policia përdori disa herë gaz lotsjellës për të shpërndarë protestuesit që ishin mbledhur përpara ndërtesave të institucioneve shtetërore. Të paktën 25 persona u plagosën, mes tyre edhe gazetarë dhe vëzhgues të pavarur. Dëshmitarë okularë thonë se forcat e rendit goditën me shkopinj gome edhe protestues paqësorë, ndërsa arrestimet u kryen në mënyrë të dhunshme.
Organizatorët e protestave paralajmërojnë se demonstratat do të vazhdojnë çdo natë deri në realizimin e kërkesave për dorëheqjen e Aleksandar Vuçiqit dhe zgjedhje të lira. Ata e akuzojnë pushtetin për përdorimin e metodave represive dhe për nxitjen e grupeve të dhunshme proqeveritare për të frikësuar qytetarët.
