Agjencia e lajmeve “Reuters” e ka parë tekstin e propozimeve të paqes, të cilat negociatorët ukrainas planifikojnë që t’ua paraqesin palës ruse në bisedimet e paqes të hënën në Stamboll.
Teksti i dokumentit ukrainas është i publikuar më poshtë i plotë, pa ndryshime:
Kornizë e Bisedimeve Ukrainë – Rusi
I. Parimet Kyçe të Marrëveshjes dhe Procesit Negociator
• Armëpushim i plotë dhe i pakushtëzuar në qiell, në tokë dhe në det si sfond i nevojshëm dhe parakusht për bisedime të paqes
• Masa për ndërtimin e besimit – adresimi i çështjeve humanitare: kthimi i pakushtëzuar i të gjithë të dëbuarve dhe i të zhvendosurve ilegalisht
Fëmijët ukrainas. Shkëmbimi i të gjithë të burgosurve (parimi “të gjithë për të gjithë”). Lirimi nga Rusia i të gjitha pengjeve civile.
• Mospërsëritja e agresionit: Qëllimi i bisedimeve është që të rivendoset baza e përhershme për paqe dhe siguri të qëndrueshme dhe për t’u siguruar që agresioni të mos ndodhë më.
• Garanci të sigurisë dhe angazhim të komunitetit ndërkombëtar: Ukraina duhet të marrë garanci të forta të sigurisë. Palët do ta ftojnë komunitetin ndërkombëtar që të marrë pjesë në bisedime dhe të ofrojë garanci që të sigurohet zbatimi i marrëveshjeve.
• Sovraniteti: Ukraina nuk është e detyruar që të jetë neutrale. Ajo mund të zgjedhe që të jetë pjesë e komunitetit euroatlantik dhe të lëvizë drejt anëtarësimit në BE. Anëtarësimi i Ukrainës në NATO varet nga konsensusi me Aleancën. Asnjë kufizim nuk mund t’u vendoset numrit, dislokimit ose parametrave të tjerë të Forcave të Armatosura të Ukrainës, si dhe dislokimit të trupave të shteteve të huaja miqësore në territorin e Ukrainës.
• Çështjet territoriale: Fitoret territoriale të bëra nga Rusia nga shkurti i vitit 2014 nuk njihen nga komuniteti ndërkombëtar. Vija e kontaktit është pikënisja e bisedimeve. Çështjet territoriale diskutohen vetëm pas një armëpushimi të plotë dhe të pakushtëzuar.
• Sanksionet: Disa sanksione mund t’i hiqen Rusisë, por në faza dhe vetëm gradualisht, me një mekanizëm për rifillimin e sanksioneve, nëse është e nevojshme (kthim i shpejtë). Asetet e ngrira sovrane ruse përdoren për rindërtim ose mbeten të ngrira derisa të paguhen dëmshpërblimet.
• Zbatimi: Pajtimi për një plan të qartë, të baraspeshuar dhe të arritshëm për zbatimin dhe futjen në fuqi të marrëveshjeve.
II. Hapi i radhës – pajtimi për armëpushim dhe për agjendën e takimit të liderëve
• Pas takimit në Stamboll, palët i vazhdojnë bisedimet të cilat duhet të përqendrohen në: (1) armëpushimin e plotë dhe të pakushtëzuar: modalitetet dhe vëzhgimin e tij; (2) masat e ndërtimit të besimit; (3) përgatitjen, pajtimin për agjendën dhe strukturën e bisedimeve të ardhshme të liderëve për tema kyçe.
• Negociatat të mbahen me pjesëmarrjen e ShBA-së dhe Evropës
III. Armëpushimi
• Armëpushim i plotë dhe i pakushtëzuar në qiell, në tokë dhe në det të paktën 30 ditë (me mundësine e zgjatjeve të afatit për çdo 30 ditë) si sfond i nevojshëm dhe parakusht për bisedime të paqes
• Vëzhgim i armëpushimit, i udhëhequr nga ShBA-ja dhe i përkrahur nga shtete të treta
IV. Masat për ndërtimin e besimit
• Pas shkëmbimit të suksesshëm të të burgosurve të luftës pas bisedimeve të Stambollit, palët e vazhdojnë procesin e shkëmbimit për të gjithë të burgosurit e luftës (parimi “të gjithë për të gjithë”).
• Marrëveshje për kthimin e pakushtëzuar nga Federata Ruse të të gjithë fëmijëve të dëbuar dhe të zhvendosur dhe lirim nga Rusia të të gjithë të burgosurve civilë. Këto masa duhet t’i përfshijnë të gjitha kategoritë e personave të përmendur në listë, duke filluar nga shkurti i vitit 2014.
V. Takimi i liderëve
• Liderët e Ukrainës dhe Rusisë takohen për t’u pajtuar për aspekte kyçe të zgjidhjes përfundimtare të paqes.
Temat kyçe të marrëveshjes së paqes për të cilat do të pajtohen liderët:
1) Ndërprerja e përhershme dhe e plotë e armiqësive:
Kushtet, vëzhgimi, sanksionet për shkelje
2) Garancitë e sigurisë dhe mospërsëritja e agresonit
3) Çështjet territoriale
4) Ekonomia, kompensimi, rindërtimi
5) Ndëshkimet për shkeljen e marrëveshjeve
6) Konkludimi i një marrëveshjeje përfundimtare të paqes
Përktheu: Nacionale/Nasuf Abdyli
