Ambasadori i Gjermanisë në Kosovë, Jorn Rohde, në një intervistë për Info Magazine në Klan Kosova, ka folur për çështjen e hapjes së urave mbi lumin Ibër në Mitrovicë.
Ai tha se qëllimi i të gjithëve është që urat të hapen, porse vendimet duhet të merren duke marrë parasysh rrethanat e sigurisë në terren.
“Me siguri KFOR-i në shumë raste ka deklaruar se mjedisi nuk është i duhur. Të gjithë ne e kemi qëllimin për ta hapur urën, nuk ka ndodhur, por nëse klima nuk është e duhur për ta hapur një urë, a është e duhura për t’i hapur dy ura? Do ta shohim,” u shpreh Rohde.
Ambasadori gjerman shtoi se ndonjëherë prioritet më i madh do të duhej t’i kushtohej zgjidhjes së problemit të trafikut në hyrje të Vushtrrisë, sesa hapjes së urave mbi Ibër.
