Sot rreth orës 10:30 është raportuar një incident i dhunshëm në ambientet e Komunës së Prishtinës, konkretisht në rrugën “UÇK”.
Tre persona janë përfshirë në një rrahje dhe janë shoqëruar nga njësitë policore për intervistim, ka konfirmuar për Paparacin zëdhënësi i Policisë, Enis Pllana.
“Sot rreth orës 10:30 është pranuar informata për një rrahje në rrugën “UÇK” në Prishtinë. Me të marrë informatën policia, ka arritur në vendin e ngjarjes dhe ka shoqëruar 3 persona, të cilët ishin përfshirë në rast. Aktualisht policia po vazhdon punën për zbardhjen e rrethanave dhe motiveve që karakterizojnë ngjarjen”.
Burime të besueshme për Paparacin bëjnë të ditur se viktimë e këtij sulmi është Fehmi Kupina, Kryesues i Kuvendit Komunal të Prishtinës, i cili dyshohet se është goditur në kokë me një shishe nga Sami Salihu, djali i ish-zyrtarit komunal Fehim Salihu.
Ngjarja ndodhi pak minuta pas përfundimit të mbledhjes së Kuvendit Komunal, ku ishte në agjendë tentimi për votimin e buxhetit të kryeqytetit.
Kupina ka pësuar lëndime në kokë dhe është dërguar me autoambulancë për trajtim mjekësor.
Fehmi Kupina, dikur pjesë e Lidhjes Demokratike të Kosovës, aktualisht është kandidat për kryetar të Prishtinës në zgjedhjet e 12 tetorit me iniciativën Lidhja për Prishtinën.
