Një përleshje fizike ka ndodhur të enjten në hapësirat e Mensës së Studentëve në Prishtinë, ku sipas informacioneve të “Paparacit”, në incident janë përfshirë disa punëtorë të mensës.
Zëdhënësi i Policisë për rajonin e Prishtinës, Enis Pllana, ka konfirmuar rastin, duke njoftuar se tre persona janë shoqëruar në stacionin policor.
Sipas tij, një person ka pësuar lëndime trupore dhe ka marrë tretman të menjëhershëm mjekësor.
“Sot rreth orës 09:30 është pranuar informata për një rrahje në progres në rrugën ‘Agim Ramdani’ në Prishtinë. Policia ka arritur në vendin e ngjarjes dhe ka shoqëruar 3 persona të përfshirë në rast. Dyshohet se një person ka pësuar lëndime trupore dhe i njëjti ka pranuar tretman mjekësor. Aktualisht policia po vazhdon punën për zbardhjen e rrethanave dhe motiveve që lidhen me ngjarjen”, deklaroi Pllana.
Hetimet mbi rastin janë në zhvillim.
