Gjatë këtij viti në Kosovë janë regjistruar rreth 1,100 raste të reja me kancer, ndërsa ekspertët e shëndetësisë shprehin shqetësim për rritjen e rasteve te personat nën moshën 50 vjeç.
Sipas drejtorit të Klinikës së Onkologjisë në QKUK, Ilir Kurtishi, kanceri i gjirit vazhdon të jetë më i përhapuri te femrat, me rreth 230 raste, ndërsa te meshkujt dominon kanceri i mushkërive. Pas tyre, më të shpeshtat janë tumoret e organeve gjenitale.
“Gjatë këtij viti kemi evidentuar rreth 1,100 pacientë me kancer për herë të parë. Grupmosha më e prekur është ajo 50–60 vjeç, por vitet e fundit po vërehet një rritje shqetësuese te të prekurit nën moshën 50 vjeç,” tha Kurtishi për Ekonomia Online.
Ai bëri thirrje për vizita të rregullta mjekësore, veçanërisht për personat mes moshës 30–50 vjeç, në mënyrë që sëmundja të zbulohet dhe trajtohet në fazat e hershme, kur shanset për shërim janë shumë më të larta.
Kurtishi theksoi rëndësinë e mosneglizhimit të simptomave dhe shmangien e vetëdiagnostikimit:
“Kanceri është sëmundje e rëndë në çdo formë të saj, por kur kapet në fazën fillestare, trajtimi është shumë më efektiv. Të mos i injorojmë simptomat dhe të mos kërkojmë këshilla nga persona të pakualifikuar. Vizita te mjeku mund të shpëtojë jetë.”
Të dhënat për të gjitha rastet malinje regjistrohen dhe përpunohen nga Instituti Kombëtar i Shëndetit Publik, në bashkëpunim me Klinikën e Onkologjisë dhe sektorët e tjerë përkatës të shëndetësisë.
