Senatori Kennedy ishte tejet i ashpër dhe i pakompromis në një paraqitje televizive në Fox News, ku tha se presidenti rus po i kthehet mbrapa secilës pikë që është pajtuar me palën amerikane, si dhe nuk po e respekton presidentin Donald Trump.
“Putin e ka hedhur poshtë çdo premtim që i ka bërë presidentit Trump, propozimi i tij i fundit është asgjë”, tha senatori nga Louisiana.
“Ai dëshiron të mbajë krejt territorin që e ka marrë, dëshiron që ta ndalojë Ukrainën t’i bashkohet NATO-s dhe dëshiron që Amerika dhe NATO të ndalojnë së ndihmuari Ukrainën”, tha ai.
“Mendoj se ai po mendon që ne i frikësohemi. Ai është tallur me presidentin Trump në çdo mundësi, nuk e ka respektuar presidentin tonë”, tha më tej senatori Kennedy.
“Nuk besoj që do të bëhet më mirë derisa t’ia bëjmë të qartë Putinit se jemi të gatshëm ta shndërrojmë atë dhe vendin e tij në ushqim për peshk. Dhe s’po flas për armë bërthamore. Do të filloja me naftën”, tha senatori që vjen nga e njëjta parti si presidenti Trump.
Ky reagim i ashpër vjen në një kohë kur presidenti Trump tha të dielën se ndoshta Putin po e mashtron dhe nuk është fare i interesuar për paqe./gazetametro.net
