Ministria e Tregtisë e Serbisë ka konfiskuar afro 900 suvenire turistike, përfshirë magnetë dhe varëse, pasi harta e Serbisë në to nuk përfshinte Kosovën.
Sipas njoftimit zyrtar, inspektorët serbë kryen kontrollin më 10 nëntor në një dyqan në pronësi të shtetasve kinezë, pas një ankese nga qytetarët serbë. Gjatë inspektimit u konstatua se mallrat ishin në kundërshtim me rregulloret, duke u cilësuar si shkelje të integritetit territorial të Serbisë.
“Janë hequr nga qarkullimi 871 magnete dhe varëse me simbolet shtetërore të Serbisë, si dhe nëntë magnete në formën e Serbisë ku nuk përfshihej harta e Kosovës,” thuhet në deklaratën e Ministrisë së Tregtisë.
Këto produkte janë të njëjtat suvenire për të cilat Qendra.Info pati raportuar muajin e kaluar, duke bërë të ditur se në disa tregje të Beogradit dhe qyteteve të tjera serbe po shiteshin magnetë me hartën e Serbisë pa përfshirë Kosovën.
Suveniret në Serbi ‘heqin’ Kosovën nga harta – artikujt e rinj shiten pa përfshirë territorin e saj.
Raportimet e mediave serbe theksojnë se këto produkte kanë shkaktuar reagime të forta mes qytetarëve, të cilët i kanë interpretuar si një njohje të pavarësisë së Kosovës në mënyrë simbolike.
