Përfunduan sot stërvitjet ndërkombëtare ushtarake “Ujku Platin 25”, të mbajtura në jug të Serbisë, pranë Bujanocit, ku morën pjesë mbi 700 pjesëtarë nga dhjetëra shtete, përfshirë Shtetet e Bashkuara të Amerikës dhe Serbinë.
Ambasada amerikane në Beograd vlerësoi lartë bashkëpunimin me ushtrinë serbe, duke e quajtur këtë ushtrim një “gurthemel të marrëdhënieve dypalëshe”. Paul Jukiq, ushtrues detyre i zëvendësshefit të misionit, tha se “Ujku Platin” është një prioritet i përbashkët për sigurinë rajonale dhe partneritetin ushtarak.
Stërvitjet u zhvilluan në bazën ushtarake “Jug” nga 12 deri më 27 qershor dhe u organizuan nga Ushtria e Serbisë me mbështetjen e Komandës Evropiane të Forcave të Armatosura të SHBA-së (EUCOM).
Përveç SHBA-së dhe Serbisë, pjesëmarrës ishin edhe njësi ushtarake nga Azerbajxhani, Bosnja e Hercegovina, Greqia, Italia, Hungaria, Rumania, Maqedonia e Veriut, Mali i Zi dhe Mbretëria e Bashkuar.
