15 tetor 2025 | Prishtinë – Presidentja e Komisionit Evropian, Ursula von der Leyen, ka dërguar një mesazh të prerë për Kosovën pas takimeve të zhvilluara me presidenten Vjosa Osmani dhe kryeministrin Albin Kurti gjatë vizitës së saj në Prishtinë.
Von der Leyen theksoi se Kosova duhet të ulë tensionet dhe të forcojë institucionet, duke nënvizuar rëndësinë e stabilitetit politik dhe institucional për të përfituar nga Plani Evropian i Rritjes.
“Është e rëndësishme që Kosova të vazhdojë ndërtimin e institucioneve të sigurta, të depërshkallëzojë tensionet dhe të finalizojë hapat e nevojshëm për të përfituar nga Plani i Rritjes,” – shkroi ajo pas takimeve në Prishtinë.
Deklarata e saj vjen në një moment të ndjeshëm politik, pas vendimit të Bashkimit Evropian që takimet me kryeministrin Kurti të mos mbahen në ndërtesën e Qeverisë, për shkak të mungesës së një qeverie me mandat të plotë.
Shefja e BE-së po zhvillon një turne në vendet e Ballkanit Perëndimor, ku më herët vizitoi Beogradin dhe pas Kosovës pritet të udhëtojë drejt Shkupit.
