Shefja e Shërbimit Informativ të Shtetit shqiptar, Vlora Hyseni, ka udhëhequr këtë javë një nga mbledhjet më të rëndësishme të inteligjencës në NATO, duke kryesuar Komitetin Civil të Inteligjencës së NATO-s (CIC) në selinë e Aleancës në Bruksel.
Më 19 nëntor 2025, Sekretari i Përgjithshëm i NATO-s, Mark Rutte, u takua me drejtuesit e inteligjencës civile dhe ushtarake nga të 32 vendet aleate, në një seri diskutimesh strategjike që preknin sfidat më të nxehta të sigurisë globale.
Rutte vlerësoi rolin kyç të inteligjencës aleate, duke theksuar se përballja me kërcënimet e reja dhe gjithnjë e më të sofistikuara nuk do të ishte e mundur pa bashkëpunimin e shërbimeve të sigurisë. Ai nënvizoi rëndësinë e inteligjencës në hartimin e planeve të mbrojtjes, rritjen e ndërgjegjësimit mbi kapacitetet e kundërshtarëve dhe vazhdimin e mbështetjes për Ukrainën.
Në takime u diskutua gjerësisht për luftën e paprovokuar të Rusisë kundër Ukrainës, bashkëpunimin e Moskës me Kinën, Korenë e Veriut, Bjellorusinë dhe Iranin, si dhe të ardhmen e inteligjencës së NATO-s, përfshirë integrimin e teknologjive të reja dhe të avancuara.
Në një kohë kur siguria globale është e ndërlidhur më shumë se kurrë, Vlora Hyseni u pozicionua në qendër të skenës së inteligjencës euroatlantike — një moment që tregon peshën e Shqipërisë dhe profesionalizmin e saj në strukturat e Aleancës. /Qendra.INFO
