Gjykata Kushtetuese nuk vendosi për ligjshmërinë e refuzimit të votimit të fshehtë.
“Zgjedhja e kryetarit/es dhe nënkryetarëve të Kuvendit është parakusht që Kuvendi të fillojë të funksionojë dhe kjo kërkon nga të gjithë deputetët të jenë të pranishëm dhe të votojnë për konstituimin e Kuvendit, në mënyrë që ky i fundit të fillojë sa më shpejt të funksionojë si organ ligjvënës, vendimmarrës”, u tha në vendim.
Por kjo po interpretohet në forma të ndryshme nga partitë politike në vend.
Për Faton Pecin e Vetëvendosjes kjo po ndodh për shkak të shijes.
“Po tash… çështja e interpretimit është edhe çështje e të kuptuarit ose shijes”, tha ai.
Më pas, me “shijen” tha se e kishte fjalën për “shijen e të kuptuarit”.
“Tash, në funksion të kësaj, kurrkund në aktvendimin e Gjykatës Kushtetuese nuk thuhet që ka deri në këtë fazë shkelje të Kushtetutës”, tha Peci.
Ai tha se ndryshimi i formës së votimit për kryeparlamentar/e “nuk mund të interpretohet si shkelje e rendit të ditës në proces të konstituimit”.
Ndryshe prej VV’së që nuk po e konsideron shkelje mospërfilljen e vendimit të Kushtetueses, nga partitë e tjera po.
Në foltore sot floën Ariana Musliu-Shoshi (PDK), Besian Mustafa (LDK), dhe Time Kadriaj (AAK), të cilët kërkuan që kryesuesi Avni Dehari të kthehet në rendin e ditës, duke refuzuar të propozojnë anëtarë për komisionin që do të organizonte votimin e fshehtë për kryeparlamentarin.
Pavarësisht thirrjeve, sërish nuk ndryshoi asgjë.
Për këtë, PDK-ja dhe LDK-ja sërish iu kanë drejtuar Gjykatës Kushtetuese.
Edhe presidentja e Kosovës, Vjosa Osmani, ka paralajmëruar dërgimin e një lënde të re në Gjykatën Kushtetuese për çështjen e konstituimit të Kuvendit.
Nëse Kuvendi nuk konstituohet shpejt, ajo ka bërë me dije se do t`i tregohet Kushtetuese për të kërkuar sqarim në lidhje me afatin prej 30 ditësh, i cili përmendet në aktgjykim.
Ajo ka deklaruar se Kushtetuesja duhet të sqarojë se cilat janë pasojat juridike nëse Kuvendi nuk konstituohet brenda afatit që është përmendur në Aktgjykimin e Gjykatës Kushtetuese.
“Ajo çka e kam përmendur është që kur diçka është e detyrueshme në aspektin kushtetues, do të thotë se moskryerja e detyrimit nuk ec pa pasoja – do të ketë pasoja juridike. Nuk është që ne mund të presim që Gjykata do të thotë: mirë, pas 30-ditësh vazhdoni njësoj. Nuk pres që do të ketë diçka të tillë. Unë planifikoj, në qoftë se nuk ka konstituim të Kuvendit shumë shpejt, që t’i drejtohem Gjykatës me kërkesë për sqarim, lidhur me atë se çka pas 30 ditësh. Sepse dua të sqarohet se cila është pasoja juridike e moskryerjes së detyrimit kushtetues të konstituimit të Kuvendit brenda 30 ditësh”, ka thënë Osmani.
Sot u bë përpjekja e 43-të e pasuksesshme për të konstituuar Kuvendin e Kosovës./Periskopi/
