Shkëndija është gati për një tjetër sfidë të madhe në arenën evropiane, teksa do të përballet me skuadrën e fuqishme të Qarabagut, në kuadër të raundit të tretë të kualifikimeve për Ligën e Kampionëve. Edhe pse kundërshtari është një emër i konsoliduar në futbollin evropian, trajneri Jeton Beqiri dhe kapiteni Besar Ibraimi shprehen optimistë për shanset e skuadrës nga Tetova.
Trajneri Beqiri e vlerësoi maksimalisht kundërshtarin, por theksoi se skuadra e tij ka kapacitet për t’u përballur denjësisht me kampionët e Azerbajxhanit.
“Qarabag është një ekip shumë serioz, me njëmbëdhjetë tituj kampioni në dymbëdhjetë sezonet e fundit. E respektojmë shumë, por nuk duhet të harrojmë asnjëherë të respektojmë edhe veten. Besoj se do t’i kemi shanset tona nëse jemi të përqendruar dhe cinikë në çdo moment të lojës,” u shpreh Beqiri.
Ai theksoi nevojën për përkushtim maksimal dhe përmirësim në lojë, duke bërë autokritikë për ndeshjen e fundit ndaj FCSB:
“Ndeshjet në Champions nuk fitohen kur nuk je në formën më të mirë. Pas ndeshjes me Steauan nuk isha i kënaqur me performancën tonë. Tani duhet të jemi agresivë, të shfrytëzojmë çdo rast dhe të japim gjithçka në fushë.”
Kapiteni i ekipit, Besar Ibraimi, duke reflektuar në paraqitjet ndaj TNS dhe FCSB, theksoi se Shkëndija ka potencial për të befasuar edhe ndaj Qarabagut:
“Nëse luajmë si me TNS dhe FCSB, do të kemi shanse edhe ndaj Qarabag. Ata janë favoritë, por nuk fiton gjithmonë favoriti. Me pak fat dhe me mbështetjen e ‘Ballistëve’, gjithçka është e mundur.”
Ibraimi nuk la pa përmendur rëndësinë e tifozëve, duke i ftuar ata të jenë të pranishëm në stadium dhe të japin mbështetjen e tyre të zakonshme.
Sfida mes Shkëndijës dhe Qarabagut pritet të jetë një duel i vështirë, por me përkushtimin e skuadrës dhe energjinë e tribunave, skuadra tetovare synon një tjetër sukses historik në Europë.
