Nga: Hoxhë Lavdrim Hamja
Në një reflektim të thellë mbi shembullin moral të Profetit Muhammed (paqja qoftë mbi të), Dr. Mustafa Mahmud sjell në vëmendje një prej çastesh më të fuqishme të historisë islame: çlirimin e Mekës dhe mesazhin e papritur që Profeti i drejtoi armiqve të tij:
“Shkoni, ju jeni të lirë!”
Ky veprim, i bërë në kulmin e fitores, është një dëshmi e qartë se fuqia më e madhe nuk është hakmarrja, por falja.
Sipas Dr. Mahmud, Profeti Muhammed ishte model i pashoq në maturi, durim, zemërgjerësi, si dhe në dëgjimin aktiv të kundërshtarit dhe debatin me dinjitet. E megjithatë, ai shpreh keqardhje për një realitet të sotëm: “Shokët tanë morën prej Pejgamberit (a.s) mjekrën dhe xhelabijen dhe nuk morën prej tij drejtësinë, durimin, faljen dhe moralin e tij të lartë.”
Kjo fjali tingëllon si një kritikë e ndershme dhe e guximshme ndaj formësimit të sotëm shpesh sipërfaqësor të besimit, ku simbolika e jashtme ka zëvendësuar përmbajtjen morale e shpirtërore.
Përmes këtij mesazhi, Dr. Mahmud nuk bën thirrje për dobësi, por për forcë morale, për dinjitet përballë padrejtësisë, dhe për tolerancë si armë e fuqishme në ndërtimin e një shoqërie më të drejtë.
Në një kohë kur zemërimi dhe polarizimi dominojnë diskursin publik, kujtimi i këtij akti të jashtëzakonshëm faljeje mbetet një dritë e fuqishme udhëzuese, për besimtarin, qytetarin dhe liderin.
