Në njoftimin e Presidencës thuhet se gjatë takimit u diskutua për zhvillimet e fundit në vend dhe për mbajtjen e zgjedhjeve te parakohshme
“Presidentja theksoi rëndësinë e mbarëvajtjes së procesit zgjedhor dhe respektimit të standardeve më të larta demokratike. Në takim u trajtuan gjithashtu edhe çështje të ndryshme të bashkëpunimit bilateral, me ç’rast Presidentja Osmani ritheksoi përkushtimin e plotë për forcimin e partneritetit me aleatin më të rëndësishëm strategjik”, thuhet në njoftim.
Dekretin për shpërndarjen e Kuvendit, Osmani e nënshkroi pas takimit që mbajti me liderët e partive, e që erdhi pas dështimit të djeshëm për formimin e Qeverisë edhe nga mandatari i dytë, Glauk Konjufca.
Osmani tha se meqë nuk kishte vullnet politik për votimin e buxhetit dhe marrëveshjeve ndërkombëtare, zgjidhja e vetme mbetën zgjedhjet.
Sa i përket datës që caktoi, 28 dhjetorit, Osmani e lidhi edhe me atë që t’i mundësohet votimi edhe mërgatës.
