Në një operacion të gjerë të ndërmarrë në mbarë territorin e vendit, Policia e Shtetit ka arrestuar 12 persona të dyshuar për zjarrvënie të qëllimshme. Këto veprime vijnë si pjesë e një strategjie të re parandaluese dhe ndëshkuese kundër zjarrvënieve, që po rrezikojnë seriozisht mjedisin, sigurinë publike dhe pronën e qytetarëve.
Sipas njoftimit zyrtar të Policisë, vetëm gjatë 72 orëve të fundit janë identifikuar dhe proceduar penalisht 12 shtetas të përfshirë në akte të qëllimshme ose të pakujdesshme zjarrvënieje. Arrestimet janë kryer në qarqe të ndryshme të vendit, përfshirë Tiranën, Durrësin, Fierin, Vlorën, Sarandën, Gjirokastrën, Kurbinin, Dibrën, Shkodrën, Poliçanin dhe Belshin/Cërrikun.
Drejtori i Përgjithshëm i Policisë së Shtetit, Ilir Proda, ka urdhëruar kalimin në gatishmëri të të gjitha strukturave vendore të policisë, duke dhënë udhëzime të qarta për përforcimin e kontrolleve në terren, rritjen e patrullimeve, si dhe hetimin e çdo rasti të dyshuar të zjarrvënies.
“Zjarret e qëllimshme janë vepra të rënda penale që nuk do të tolerohen. Do të përdorim të gjithë mekanizmat e ligjit për të ndëshkuar autorët”, thuhet në deklaratën zyrtare të Policisë.
Ndërkohë, Policia u bën thirrje qytetarëve që të tregojnë përgjegjësi maksimale, duke shmangur ndezjen e zjarreve në natyrë apo hedhjen e cigareve të ndezura në anë të rrugëve. Çdo pakujdesi e vogël mund të kthehet në një rrezik të madh për pyjet, jetën e njerëzve dhe pronën.
Qytetarët ftohen që të raportojnë menjëherë çdo rast zjarrvënie në numrin emergjent 112 ose përmes aplikacionit “Komisariati Dixhital”, me qëllim që ndërhyrja të jetë sa më e shpejtë dhe dëmet të minimizohen.
Ky reagim i shpejtë dhe i koordinuar vjen në një kohë kur vendi po përballet me temperatura të larta dhe rrezik të shtuar për zjarre në zona pyjore e rurale.
