Ndeshja e shumëpritur ndërmjet Shqipërisë dhe Serbisë, që zhvillohet këtë të shtunë, ka ndezur jo vetëm emocionet e tifozëve, por edhe tregun e zi të biletave. Burime të Qendra.Info konfirmojnë se biletat për këtë përballje janë duke u shitur jashtë kanaleve zyrtare me çmime marramendëse që shkojnë deri në 400 euro, ndërsa më e lira kap vlerën e 150 eurove.
Kërkesa e madhe, mungesa e biletave dhe rëndësia simbolike e ndeshjes kanë nxitur spekulantët të përfitojnë, duke abuzuar me çmimet dhe duke i vënë tifozët përballë zgjedhjes: të paguajnë shumëfishin apo të mos jenë pjesë e stadiumit.
Tifozë të ndryshëm kanë raportuar përmes rrjeteve sociale dhe grupeve të tifozërisë se kanë hasur oferta në “tregun paralel” që shkojnë deri në 500 euro, në varësi të pozicionit të biletës. Ndërkohë, Federata Shqiptare e Futbollit (FSHF) ka paralajmëruar që biletat e blera nga burime të paautorizuara mund të rezultojnë të pavlefshme.
“Mos blini bileta nga tregtarë të palicencuar – rrezikoni të mos futeni në stadium,” – thuhet në një njoftim të FSHF-së.
Ndeshja Shqipëri–Serbi mbetet një nga përballjet më të ndjeshme dhe më të komentuara në historinë e futbollit shqiptar, ndaj atmosfera e nxehtë nuk është vetëm në fushë – por edhe jashtë saj.
