Kryeministri në detyrë, Albin Kurti, dhe kreu i Nismës Socialdemokrate, Fatmir Limaj, janë takuar të premten në një takim që ka zgjatur mbi dy orë, por pa ndonjë rezultat konkret sa i përket konstituimit të institucioneve të reja.
Burime të afërta me zhvillimet kanë bërë të ditur për Klan Kosovën se një takim i dytë pritet të ndodhë në ditët në vijim, me qëllim për të arritur një marrëveshje për kapërcimin e ngërçit politik që po zgjat tashmë prej disa javësh.
Sipas të njëjtave burime, tema kryesore e diskutimeve ka qenë arritja e një marrëveshjeje për zgjedhjen e kryekuvendarit dhe hapjen e rrugës për formimin e Qeverisë së re. Takimi i radhës mes dy liderëve pritet të jetë vendimtar nëse palët do të arrijnë një konsensus për të tejkaluar bllokadën aktuale politike.
Ndërkohë, Kuvendi i Kosovës vazhdon të jetë i pa-konstituar pas 49 seancash të dështuara, ndërsa afati kushtetues për formimin e institucioneve po afrohet me shpejtësi.
