Autoriteti i Ushqimit dhe Veterinarisë (AUV) ka urdhëruar mbylljen e dy strehimoreve të paligjshme për qen, të cilat ishin financuar nga Komuna e Prishtinës. Vendimi u mor pas inspektimeve të realizuara me kërkesë të Fondacionit për të Drejtat e Kafshëve, që kishte ngritur shqetësime të vazhdueshme për abuzime dhe kushte të rënda.
Çfarë zbuloi AUV?
-
Higjienë e tmerrshme: Ambientet ishin të papastra, pa ndarje të përshtatshme për kafshët.
-
Mungesë e ujit të pijshëm dhe kujdesit bazik për kafshët.
-
Qentë mbaheshin në temperatura ekstreme, të ekspozuar nën diell, pa strehim të duhur.
-
Një qen i vdekur u gjet gjatë inspektimit, ndërsa kishte raporte për erë të rëndë që vinte nga kafshë të tjera të ngordhura.
-
Numri i qenve nuk përputhej me raportimet zyrtare, duke ngritur dyshime për keqpërdorim të fondeve dhe manipulim me shifra.
-
Mungesë totale e dokumentacionit veterinar, duke cenuar seriozisht shëndetin publik dhe sigurinë e kafshëve.
Strehimoret menaxhoheshin nga Premtim Gashi dhe Florentina Bajrami, të cilët, sipas kontratave me Komunën e Prishtinës, paguheshin 50 euro për qen në muaj. Por, sipas Fondacionit, realiteti në terren ishte larg çdo standardi të mirëqenies së kafshëve.
Fondacioni për të Drejtat e Kafshëve ka akuzuar Komunën për injorim sistematik të kërkesave për transparencë dhe përjashtim nga vizitat monitoruese, gjë që sipas tyre është bërë për të fshehur shkeljet.
“Ky është një abuzim i qartë i fondeve publike dhe një neglizhencë totale ndaj mirëqenies së kafshëve nga njerëz që deklarojnë publikisht se ‘mirëqenia e kafshëve është prioritet’”, thuhet në reagimin e Fondacionit.
Rasti tani është në duart e institucioneve hetimore dhe mbetet të shihet nëse do të ketë përgjegjësi ligjore dhe politike për këtë skandal.
