Presioni ndaj Presidentit amerikan Donald Trump po rritet pas publikimit të mijëra faqeve me e-maile të papublikuara më parë nga pasuria e Jeffrey Epstein, multimilionerit të njohur për rrjetin e trafikimit seksual. Dhomën e Përfaqësuesve do ta presë javën e ardhshme një votim për publikimin e plotë të dokumenteve, ka njoftuar kryetari Mike Johnson.
Pas publikimit nga demokratët të tre fragmenteve të reja nga e-mailet e Epstein-it, republikanët u kundërpërgjigjën duke publikuar rreth 20 mijë faqe të tjera komunikimesh, ku shfaqen lidhjet e tij të gjera me figura me ndikim në SHBA dhe në arenën ndërkombëtare.
Në qendër – Lavrov dhe takimi Trump–Putin
“Politico” raporton për një e-mail ku Epstein sugjeronte që Sergei Lavrov, ministri i Jashtëm rus, të kërkonte vlerësimin e tij personal për Donald Trump, para takimit të Trump me Vladimir Putin në Helsinki në vitin 2018.
“Mendoj se mund t’i sugjeroni Putinit që Lavrov të fitojë disa njohuri duke folur me mua”, kishte shkruar Epstein në një e-mail drejtuar Thorbjørn Jagland, ish-kryeministër i Norvegjisë dhe atë kohë kryetar i Këshillit të Evropës.
Ai gjithashtu pretendonte se kishte diskutuar për Trump me ambasadorin rus në OKB, Vitaly Churkin, para se ai të vdiste në vitin 2017.
Tentativa për ndikim ndaj Steve Bannon
E-mailet e publikuara zbulojnë gjithashtu një komunikim të vazhdueshëm me Steve Bannon, ish-këshilltarin kryesor të Trump. Në vitin 2018, Epstein i shkruante Bannon se mund t’i organizonte takime “kokë më kokë” me shumë udhëheqës botërorë, për sa kohë që Bannon ishte i gatshëm të kalonte disa ditë në Evropë.
“Nëse doni të jeni në këtë lojë, duhet të investoni kohë; Evropa nuk funksionon nga distanca”, kishte shkruar Epstein.
Epstein – rrjeti i abuzimit dhe vdekja e dyshimtë
Jeffrey Epstein, për vite të tëra, drejtoi një rrjet trafikimi seksual që përfshinte dhjetëra vajza të reja, përfshirë të mitura. Ai u arrestua dhe u dënua, por vdiq në qelinë e tij në vitin 2019. Raporti zyrtar e cilësoi vdekjen si vetëvrasje, megjithatë rretha të shumta ushqyen hamendësime për ndërhyrje nga qarqe të fuqishme.
Epstein njihej për lidhjet e tij me politikanë, biznesmenë dhe figura të larta publike. Skandali çoi madje në rrëzimin e titullit princëror të Andrew Mountbatten-Windsor, vëllait të mbretit britanik, i cili u përfshi drejtpërdrejt në hetime./Qendra.INFO
