Sot, më 7 gusht 2025, me fillim nga ora 17:00, në sheshin “Skënderbeu” në Prishtinë do të mbahet një protestë gjithëpopullore kundër vendimeve të Gjykatës Speciale në Hagë, e cila po gjykon ish-krerët e Ushtrisë Çlirimtare të Kosovës.
Organizatorët, kryesisht organizatat e dala nga lufta e UÇK-së, kanë ftuar qytetarët që të bashkohen në këtë tubim paqësor, për të kundërshtuar, siç thuhet, padrejtësitë dhe proceset e motivuara politikisht kundër luftës çlirimtare.
Protesta vjen në një kohë kur gjykimi në Hagë ka hyrë në faza kyçe, dhe përfaqësues të shoqërisë civile, familjarë të të akuzuarve dhe shumë qytetarë po kërkojnë drejtësi të barabartë dhe respektim të luftës së UÇK-së.
Në mbështetje të protestës janë shprehur edhe figura të njohura politike, publike dhe kombëtare nga të gjitha trojet shqiptare. Në shesh pritet pjesëmarrje e gjerë nga qytetarë të Kosovës dhe më gjerë.
