Një studim i Harvard Medical School, i publikuar në JAMA Surgery, ka zbuluar se kirurgët në SHBA kanë një shkallë vdekshmërie nga kanceri mbi dy herë më të lartë se mjekët që nuk ushtrojnë kirurgjinë dhe rreth 20% më të lartë se shumica e punëtorëve të tjerë jo-mjekë.
Hulumtimi ka analizuar të dhëna nga 1.08 milionë persona të moshës 25–74 vjeç, përfshirë 224 kirurgë dhe 2,740 mjekë të tjerë.
Ndërsa vdekshmëria e përgjithshme e kirurgëve mbetet më e ulët se ajo e popullatës së përgjithshme, rezultatet tregojnë një diferencë të ndjeshme në rastet e vdekjes nga kanceri: 193.2 për 100 mijë te kirurgët, kundrejt 87.5 për 100 mijë te mjekët e tjerë.
Autorët sugjerojnë se kjo diferencë mund të lidhet me faktorë specifikë të mjedisit të punës së kirurgëve, pasi njohuritë dhe burimet shëndetësore janë të ngjashme me mjekët e tjerë.
Heqja e tepricës së rasteve të kancerit do t’i vendoste dy grupet pothuajse në nivele të njëjta vdekshmërie.
Në grupet e tjera të sëmundjeve, kirurgët rezultuan më pak të rrezikuar nga diabeti, sëmundjet e frymëmarrjes, gripi apo sëmundjet e veshkave, duke e bërë kancerin të vetmin shkaktar ku ata tejkalojnë të gjitha grupet e tjera të krahasuara.
