Një studim i ri nga Rothman Institute Foundation në Filadelfia ka zbuluar se më shumë se gjysma e pacientëve të certifikuar për përdorim të kanabisit mjekësor në trajtimin e dhimbjeve kronike muskulore dhe kockore, e ndërpresin terapinë brenda një viti.
Sipas të dhënave të publikuara në revistën PLOS One, 57.9% e pacientëve nuk e kanë vazhduar trajtimin, ndërsa gati gjysma e tyre kanë hequr dorë që në tre muajt e parë.
Studimi thekson se mosha është faktori kryesor që ndikon në këtë vendim. Pacientët që e ndërprenë përdorimin e kanabisit mjekësor kishin një moshë mesatare prej 71.5 vjeç, krahasuar me 64.5 vjeç tek ata që vijuan trajtimin. Në anën tjetër, lloji i dhimbjes apo gjendja shëndetësore fillestare nuk dolën të ishin përcaktues.
Ekspertët mjekësorë vlerësojnë se arsyet e ndërprerjes lidhen me një kombinim faktorësh: pakënaqësia me efektet, kostoja e lartë, efektet anësore si dhe orientimi drejt trajtimeve alternative.
Autorët e kërkimit nënvizojnë se rezultatet ngrenë pikëpyetje mbi efektivitetin afatgjatë të kanabisit mjekësor, veçanërisht tek pacientët e moshuar. Ata sugjerojnë nevojën për studime më të gjera që do të ndihmojnë të përcaktohet se cilët pacientë përfitojnë më shumë nga ky trajtim.
