Për vite me radhë, një gotë verë me darkë apo një koktej fundjave është parë jo vetëm si i pranueshëm, por edhe i dobishëm për shëndetin.
Megjithatë, shkencëtarët thonë se kjo ide është tashmë e vjetëruar.
Ekspertë nga Stanford Medicine theksojnë se nuk ka prova të forta që alkooli, edhe në sasi të vogla, sjell përfitime shëndetësore.
Përkundrazi, hulumtimet e fundit tregojnë se rrit rrezikun e kancerit, sëmundjeve kardiovaskulare dhe dëmtimeve të mëlçisë e trurit.
Një studim i vitit 2024 me mbi 135 mijë persona mbi 60 vjeç tregoi se edhe pirja e moderuar lidhet me rritje të vdekshmërisë, sidomos nga kanceri, shkruan MedicalXpress.
Shkencëtarët theksojnë se alkooli metabolizohet në acetaldehid, një substancë që dëmton ADN-në dhe rrit rrezikun për kancer të gojës, fytit, ezofagut, zorrës së trashë dhe gjirit tek gratë.
Sipas tyre, nocioni i “pirjes së moderuar” është i rrezikshëm, pasi efektet ndryshojnë nga individi në individ në varësi të moshës, gjinisë, gjendjes shëndetësore dhe faktorëve gjenetikë.
Organizata Botërore e Shëndetësisë tashmë deklaron se asnjë sasi alkooli nuk është plotësisht e sigurt.
Ndërkohë, vende si Kanadaja kanë ulur rekomandimet në jo më shumë se dy pije në javë, ndërsa po shtohen thirrjet që pijet alkoolike të mbajnë paralajmërime për rrezikun e kancerit – njësoj si duhani.
Ekspertët këshillojnë qytetarët që ta shohin konsumin e alkoolit si një zgjedhje me rrezik, jo si zakon të padëmshëm. Siç thotë profesori Randall Stafford:
“Nuk kemi prova të forta për ndonjë përfitim, por kemi prova të forta për dëmet. Sasia e vetme plotësisht e sigurt është zero.
