Dobropillia, Ukrainë – 17 Korrik 2025 –
Një sulm ajror rus goditi të mërkurën një qendër tregtare dhe një treg në qytetin Dobropillia, afër vijës së frontit në lindje të Ukrainës, duke shkaktuar vdekjen e dy personave dhe plagosjen e të paktën 27 të tjerëve, njoftuan autoritetet lokale.
Sipas guvernatorit të rajonit të Donjeckut, Vadym Filashkin, bomba 500-kilogramëshe shpërtheu në orën 17:20, në një moment kur qytetarët ndodheshin brenda dyqaneve. “Okupuesi e hodhi bombën në një kohë kur Dobropillia ishte plot me njerëz. Shumë ishin duke bërë pazar. Qendra tregtare u shënjestrua qëllimisht”, deklaroi ai për mediat ukrainase.
Përveç viktimave, tetë ndërtesa banimi dhe po aq automjete janë shkatërruar, ndërsa mbi 30 stenda tregtare kanë pësuar dëme të konsiderueshme. Pamjet e shpërndara në rrjetet sociale shfaqin zona të djegura dhe tym të dendur në qendër të qytetit.
Shërbimet e emergjencës po vazhdojnë operacionet e shpëtimit, me shqetësime se ende mund të ketë persona të bllokuar në qendrën tregtare.
Presidenti i Ukrainës, Volodymyr Zelensky, e cilësoi sulmin si një akt “terrori të pastër dhe të pamend” nga Rusia. “Nuk ka logjikë ushtarake në këto sulme. Është vetëm përpjekje për të marrë jetë të pafajshme,” tha ai në fjalimin e tij të përnatshëm.
Dobropillia ndodhet në veriperëndim të qytetit Pokrovsk, një zonë e rëndësishme ku forcat ruse kanë shtuar presionin ushtarak muajt e fundit. Kujtojmë se në mars të këtij viti, një tjetër sulm në këtë qytet kishte lënë 11 viktima, përfshirë pesë fëmijë.
