Në prag të ndeshjes kualifikuese për Kampionatin Botëror mes Serbisë dhe Shqipërisë, është zhvilluar një takim zyrtar mes përfaqësuesve të Federatës Shqiptare të Futbollit (FSHF) dhe Federatës Serbe të Futbollit (FSS).
Takimi, i mbajtur në qytetin e Leskovcit, ku do të luhet ndeshja këtë të shtunë në mbrëmje, u zhvillua në një frymë të mirë bashkëpunimi dhe respekti reciprok.
Në qendër të diskutimeve ishin organizimi i ndeshjes, siguria e skuadrave dhe stafeve, si dhe mesazhi i sportit si urë komunikimi midis popujve.
Burime nga FSHF bëjnë të ditur se palët shprehën vullnetin për të promovuar vlerat sportive, për të shmangur çdo lloj incidenti dhe për të dhënë një shembull pozitiv të sjelljes korrekte dhe respektit në futboll.
“Futbolli është mjeti më i mirë për të ndërtuar ura mirëkuptimi mes njerëzve dhe vendeve. Kjo ndeshje duhet të jetë një festë sportive, jo një arsye për ndasi,” thuhet ndër të tjera në reagimin e Federatës Shqiptare të Futbollit.
Takimi u përshëndet edhe nga përfaqësues të UEFA-s, të cilët janë të pranishëm në Leskovc për monitorimin e ndeshjes.
Ata vlerësuan bashkëpunimin midis dy federatave si një hap pozitiv drejt normalizimit të marrëdhënieve sportive në rajon.
Ndeshja Serbi–Shqipëri pritet të luhet nën masa të rrepta sigurie, ndërsa organizatorët shpresojnë që ajo të kalojë pa incidente dhe të jetë një demonstrim i vërtetë i frymës sportive.
