Tiranë – Për të diskutuar pozitën e shqiptarëve të Luginës së Preshevës, një delegacion nga Lugina u prit sot në Ministrinë për Evropën dhe Punët e Jashtme të Republikës së Shqipërisë nga ministrja znj. Elisa Spiropali.
Lajmi është bërë i ditur nga Kryetari i Këshillit Nacional Shqiptar, Enkel Rexhepi, i cili përmes një statusi publik njoftoi se gjatë takimit u diskutuan të gjitha çështjet kyçe që lidhen me të drejtat dhe pozitën e shqiptarëve në Luginën e Preshevës, si dhe nevoja për një qasje të përbashkët, programatike dhe sistematike për zgjidhjen e tyre.
Sipas Rexhepit, temat e diskutuara përfshinin pasivizimin e adresave, mosnjohjen e diplomave, mungesën e teksteve shkollore në gjuhën shqipe, përjashtimin e shqiptarëve nga jeta institucionale, si dhe vazhdimin e mohimit të së drejtës për përdorimin e simboleve kombëtare shqiptare.
Takimi vjen vetëm disa orë pasi qendra.info raportoi për bllokimin e fondeve të Republikës së Shqipërisë, të dedikuara për shqiptarët në Serbi, nga ana e Bankës Popullore të Serbisë – një çështje që ka ngritur shqetësime serioze dhe që lidhet drejtpërdrejt me pamundësinë e realizimit të projekteve dhe mbështetjes institucionale për komunitetin shqiptar në Luginë.
Rexhepi ka falënderuar ministren Spiropali për, siç u shpreh ai, “mikpritjen e ngrohtë e vëllazërore dhe gatishmërinë për bashkëpunim të vazhdueshëm”, duke falënderuar gjithashtu Ambasadën e Shqipërisë në Beograd për koordinimin e vazhdueshëm në adresimin e këtyre çështjeve.
“Në fund, më shumë Shqipëri dhe Kosovë në Luginë do të thotë më shumë shpresë për shqiptarët e Luginës. Bashkë jemi më të fortë”, ka përfunduar Rexhepi./Qendra.Info
