Të paktën 30 civilë palestinezë humbën jetën të mërkurën në veri të Rripit të Gazës, pasi forcat izraelite hapën zjarr ndaj turmave që prisnin ndihma humanitare, njoftoi zëdhënësi i mbrojtjes civile në Gaza, Mahmud Bassal. Sipas tij, mbi 300 persona të tjerë u plagosën në këtë sulm.
Ngjarja ndodhi në kushte të rënda humanitare, ku mijëra banorë të Gazës të uritur dhe të dëshpëruar presin çdo ditë ndihma bazike për mbijetesë. Autoritetet izraelite kanë justifikuar vazhdimisht sulmet ndaj zonave të shpërndarjes së ndihmave me pretendimet për keqpërdorim nga Hamasi, por deri më tani nuk kanë ofruar prova konkrete për këto akuza.
Ndërkohë, Zyra e Kombeve të Bashkuara për Koordinimin e Çështjeve Humanitare (OCHA) deklaroi se katër ditë pas shpalljes së “pauzave taktike” nga ushtria izraelite, civilët vazhdojnë të vdesin nga uria, kequshqyerja dhe dhuna në vendgrumbullimet e ndihmave.
Drejtori i spitalit Al-Shifa, Mohammed Abu Salmiya, konfirmoi për mediat arabe se 35 persona të plagosur janë pranuar në spitalin e tij pas një tjetër incidenti, ku forcat izraelite kanë shtënë rreth 3 kilometra në jugperëndim të kalimit kufitar Zikim.
Ndërkohë që situata në terren përkeqësohet dhe negociatat për armëpushim janë bllokuar, i dërguari i posaçëm amerikan, Steve Witkoff, pritet të mbërrijë të enjten në Izrael për të rindezur përpjekjet diplomatike. Ai ka qenë i përfshirë në raundet e mëparshme të negociatave indirekte mes Izraelit dhe Hamasit, të cilat u ndërprenë javën e kaluar pas tërheqjes së delegacioneve nga Doha.
Vizita e Witkoff vjen në një moment kur Kanadaja ka paralajmëruar synimin për të njohur shtetin palestinez në Asamblenë e Përgjithshme të OKB-së në shtator, duke ndjekur shembullin e Francës dhe Mbretërisë së Bashkuar.
