Vapa përvëluese e verës ka përfshirë vendin, duke e bërë të vështirë përballimin e temperaturave që rriten ndjeshëm që në orët e paradites. Sipas ekspertëve të shëndetit, ekspozimi i zgjatur në nxehtësi ndikon direkt në aftësinë e trupit për të djersitur – mekanizëm ky thelbësor për freskimin natyral të organizmit.
Kur djersitja pengohet, rritet rreziku për goditje nga nxehtësia. Ndër simptomat paralajmëruese janë skuqja e lëkurës, kontraktimet muskulore, tharja e lëkurës dhe ndjenja e konfuzionit. Në raste më ekstreme, mund të shfaqet humbja e vetëdijes.
Grupet më të ndjeshme ndaj vapës përfshijnë të moshuarit, fëmijët, personat obezë dhe ata që përdorin medikamente të caktuara.
Metoda e shpejtë për freskim: uji i ftohtë në kyçe
Një mënyrë praktike dhe efektive për uljen e temperaturës trupore është mbajtja e kyçeve të dorës nën ujë të ftohtë. Ekspertët sugjerojnë që secili kyç të qëndrojë për të paktën 30 sekonda nën ujin e rrjedhshëm të rubinetit. Kjo ndihmon në uljen e temperaturës së gjakut në atë zonë, i cili më pas qarkullon nëpër trup duke ndihmuar në freskimin e përgjithshëm për rreth një orë.
Hidratimi, arma kryesore kundër vapës
Përveç metodave të jashtme, kujdesi nga brenda është po aq i rëndësishëm. Mjekët rekomandojnë konsum të rregullt të ujit gjatë gjithë ditës, si dhe fruta të pasura me lëngje për të ruajtur balancën hidrike dhe për të lehtësuar përballimin e temperaturave ekstreme.
