Drejtoria për Siguri dhe Emergjenca në Prishtinë ka bërë thirrje për kujdes të shtuar në temperaturat e larta.
Në njoftim thuhet se vetëm katër ditëve të para të muajit Korrik 2025 (01.07 – 04.07 deri në ora 19:00), Brigada Profesionale e Zjarrfikësve të Kryeqytetit ka intervenuar në 73 raste emergjente, përfshirë: 8 zjarre, në objekte, 32 zjarre në bar të thatë, 9 zjarre në male dhe shkurre, 3 zjarre në ara me grurë, 4 zjarre në mbeturina, 3 zjarre nga pajisje elektrike, 2 zjarre veturash, 5 intervenime teknike dhe 7 shërbime të tjera.
Më tej, bëhet e ditur se vetëm gjatë ditës së djeshme (04.07.2025), janë trajtuar 19 raste, ndër to 13 zjarre në bar të thatë dhe 2 në zona malore, duke dëshmuar rrezikshmërinë e shtuar gjatë valës së të nxehtit.
“Ky angazhim i jashtëzakonshëm pasqyron profesionalizmin, përkushtimin dhe vetmohimin e pjesëtarëve të Brigadës sonë, të cilët, me rrezik për jetën, mbrojnë qytetin dhe qytetarët çdo ditë”.
Drejtoria për Siguri dhe Emergjenca u ka bërë thirrje qytetarëve të kryeqytetit të mos ndezin zjarre.
“Lutemi mos ndizni zjarre në natyrë, mos i hidhni cigaret në bar të thatë, dhe tregoni kujdes të shtuar në këtë periudhë me temperatura të larta! Veprimet e pakujdesshme rrezikojnë jetën, pasurinë dhe natyrën tonë të përbashkët. Parandalimi është përgjegjësi e përbashkët. Bashkë për një Kryeqytet më të sigurt”.
