Presioni në sy është një ndër shqetësimet më të zakonshme që prek sytë dhe shpeshherë shoqërohet me dhimbje, turbullim të shikimit dhe ndjeshmëri ndaj dritës. Edhe pse mund të duket si diçka e lehtë, në shumë raste është sinjal i problemeve më serioze shëndetësore që kërkojnë trajtim të menjëhershëm.
Ndër shkaqet më të zakonshme të këtij presioni janë infeksionet e sinuseve, të cilat shkaktojnë dhimbje fytyre, temperaturë dhe bllokim të hundës. Po ashtu, edhe dhimbjet e forta të kokës, sëmundjet autoimunitare që dëmtojnë nervin optik dhe problemet dentare mund të përhapin dhimbje dhe tension deri te sytë.
Ekspertët këshillojnë që të konsultoheni me mjekun nëse përjetoni simptoma si rënie të shikimit, dhimbje të forta të kokës, temperaturë të lartë apo humbje ndjesie në pjesë të trupit, pasi këto mund të tregojnë një gjendje të rrezikshme.
Për të lehtësuar presionin në kushte shtëpie, rekomandohet një ushqyerje e pasur me vitamina A, C dhe E, pirje e mjaftueshme e lëngjeve, reduktim i kafeinës dhe gjumë me kokën pak të ngritur. Kujdes duhet treguar edhe me përdorimin e medikamenteve për sy, pasi tejkalimi i dozës mund të shkaktojë dëmtime në nervin optik.
Shëndeti i syve është i lidhur ngushtë me stilin e jetës, ndaj çdo shqetësim nuk duhet neglizhuar.
