Muaji tetor shënon lindjen e At Gjergj Fishtës, kolosit të letrave shqipe, i njohur ndryshe si “Homeri shqiptar”. Për këtë arsye, ky muaj njihet ndryshe edhe si “Tetori Fishtjan”, në nder të figurës së tij të paharruar.
Njohësi dhe studiuesi i veprës së Fishtës, Frano Kulli, ka ndarë lidhjen e veçantë që poeti i madh kishte me qytetin e Lezhës, duke theksuar se satira e Fishtës ishte një armë e hollë artistike, unike në llojin e saj dhe e papërsëritshme në letërsinë shqipe.
“Sarkazma dhe ironia e Fishtës nuk kishin të dytë — ato ishin pasqyrë e mençurisë dhe guximit të tij”, shprehet Kulli.
Ndërkohë, për të disatin vit radhazi, në Lezhë zhvillohet konkursi kombëtar “At Gjergj Fishta”, ku marrin pjesë autorë nga e gjithë Shqipëria dhe nga trevat shqipfolëse. Ky aktivitet e ka kthyer qytetin në një qendër të rëndësishme të promovimit të letërsisë dhe trashëgimisë kulturore shqiptare.
Trashëgiminë e Fishtës në Lezhë e mban gjallë Nikolla Prendi, një pasardhës shpirtëror i poetit, i cili ndan emocionet dhe përgjegjësinë që mbart emri i madh i Fishtës.
Sipas tij, “përmes brezave, vargjet e At Gjergj Fishtës kanë jetuar, janë recituar dhe janë ndjerë me të njëjtin zjarr që poeti i madh ua dha fillimisht. Janë vargje të gjalla, që nuk vdesin kurrë.”
Kështu, Lezha, përmes kujtimit, fjalës dhe artit, vazhdon të mbajë të ndezur dritën e At Gjergj Fishtës, duke e bërë Tetorin Fishtjan një simbol krenarie dhe identiteti kombëtar.
